2017 grënnen d’Annick Sinner an d’Nadine Kauffmann den Duo Toile Si-Re, fir déi grouss Lëtzebuerger Klassiker a Form vun engem musikalesche Figurentheater op d’Bün ze bréngen. Déi éischt Produktioune sinn De Wëllefchen an de Fiisschen vum Dicks, gefollegt vun D’Maus Kätti vum Auguste Liesch.

Vun 2020 u entwéckelt den Duo mat der Serie Semplice – Back to Basics eng nei kënschtleresch Form ouni Sprooch, an där Bild a Musek gläichberechtegt matenee dialogéieren. Den éischte Projet, Lice & Semp, ass e live gezeechente Concert mat originaler Musek. Mat Tolo & Scoia féiert den Duo dës Aarbecht weider a verbënnt Figurentheater, Zeechnung, Pabeier a Musek zu enger gemeinsamer kënschtlerescher Sprooch.

Den Numm Toile Si-Re verbënnt schonn am Wuert dat, wat den Duo ausmécht. Dem Annick seng Molerei, Illustratioun a Szenografie treffen op dem Nadine seng Musek, déi si fir all Kreatioun nei entwéckelt, komponéiert a live interpretéiert.

Zënter senger Grënnung huet Toile Si-Re mat senge Produktioune méi wéi 150 Virstellunge gespillt – a Kulturhaiser an Theateren, bei Familljen- a Schoulvirstellungen, an Altersheemer an och fir Kanner à besoins spécifiques. All d’Produktioune bleiwen am Repertoire a kënnen zu all Moment nees programméiert ginn. Sou entsteet iwwer d’Joren eng Sammlung vun zäitlose Spektakelen, déi dofir geduecht sinn, ëmmer nees nei Generatioune vu Kanner an Erwuessenen ze begeeschteren.